شهادة جميل عيسى عن نزوحه 4 مرات خلال الحرب
الوقت المقدر للقراءة: 6 دقيقة
منذ 9 أشهر
هذهِ شهادة السيد جمال خليل عبد الكريم عيسى عن ترحيله للمرة الرابعة من البريج وصولا إلى رفح بسبب التهجير الممنهج الذي يمارسه الاحتلال الإسرائيلي، أجرى الصحفي هاني الشاعر معه هذه المقابلة، وهذا نقل لشهادته كما وردت على لسانه:
أنا اسمي جمال خليل عبد الكريم عيسى من سكان شرق البريج؛ أنا هذي الترحيلة الرابعة إلي طبعا بفضل الله طلعت من داري لأنو داري راحت بيعوِّض الله، طلعت عالنصيرات قالوا آمنة! بعدين رحت من النصيرات طلعت عالزوايدة قالوا آمنة!
طلعنا من الزوايدة إجينا ع رفح قالوا آمنة! طبعا كلياتو بتعليمات من جيش الدفاع.. من الإحتلال! كانوا يرموا منشورات ارحلوا! بنرحل؛ الآن وصلنا حدود المصريين.. ما ضلش بعد هيك! هي حدود المصريين وهينا عايشين هانا (يشير إلى قرب الحدود المصرية من موقعه) قالوا رفح آمنة.. اليوم نتنياهو بيقول بدو يحتل محور فيلادلفيا طب رفح فش فيها وسع!
هنا يعني هي المكان الوحيد أو أسوأ مكان فالعالم لقيناه فاضي نعيش فيه، طبعا الحمدلله رب العالمين أكلنا وبناكل برمل، شربنا والحمدلله رب العالمين فش مي هي ميتنا مالحة وبنعبيها بجرادل من حوالي 3 كيلو أو 4 كيلو عشان نجيب قلن ميه عشان نتوضى! 25 يوم إلي أنا ما تحممتش.. مش أنا لحالي! أنا بحكي عن أربع عائلات هانا؛ أربع عائلات.. إذا أربع عائلات هنا إحنا حوالي 32 أو 33 نفر عايشين يعني.. نتمنى الموت.
ليش؟ إيش ذنبنا؟ عشاننا فلسطينيين؟ إحنا هان دفعنا مصارينا.. إحنا جينا هانا لحتى الآن الخيم هذي؛ طبعا استغلال تجار لا يطاق.. استغلال التجار لا يطاق خيمة زي هذي نايلون.. نايلون! 5 آلاف شيكل.. 5 آلاف شيكل!! طب أنا اليوم قادر في غيري مش قادر! والله منعرف كيف جبناهن!
اليوم عندنا مشكلة أكبر، أكبر من هيك، اليوم إحنا نفسنا نصلي الجمعة.. نفسنا نصلي الجمعة! اليوم إلنا 100 يوم.. 100 يوم بدون صلاة جمعة؛ يعني أنت بتحكي عن حوالي 15 جمعة راحت.. 15 جمعة! الآن المؤذن لما بيقلك "صلوا في رحالكم" مين فالعالم العربي والإسلامي بيعرف كلمة صلوا في رحالكم إيش معناها؟ بيقلك بعرفش.. إحنا صرنا نعرفها؛ صرنا نشتاق لصلاة الجماعة ممنوع؛ ليش؟ خايفين الجوامع تنقصف؛ إحنا مش خايفين ع حالنا خايفين ع أولادنا.. الأطفال إيش ذنبهم؟ الأطفال اليوم يعني عايشين في براري احنا.. في براري عايشين لكن بنقول الحمد لله رب العالمين.
