شهادات مفزعة لفلسطينيي شمال غزة عن لجوئهم لعلف الحيوانات
هذه شهادات مواطنين فلسطينيين في شمال غزة حول لجوئهم لعلف الحيوانات بسبب سياسة التجويع القسري التي يمارسها الاحتلال الاسرائيلي على سكان شمال قطاع غزة، تم تسجيل هذه الشهادات بشكل خاص لموقع حكايا غزة وهذا نقل نصي لها كما وردت:
النص:
المراسل: طيب ايش خلاك تجي اليوم هانا عند دوار ؟
إبراهيم الجرجاوي "شاهد 1": زي زي باقي الناس الجوع، الجوع، "يشير إلى الناس حوله" هذا جيعان و هذا جيعان، وانا جيعان، وهذا جيعان، كلنا جيعانين ريح رأسك، بدك تاكل صحن رز حقه خمسة شيكل، اليوم صحن الرز حقه خمسة شيكل، واقفين بنستنى مقاطير الطحين زينا زي باقي الناس.
تقول جن جنونهم الإسرائيليين، طبو رزع قذائف بهالناس ولا حد بيقدم ولا حد بيعترض لهم، كل هدول اللي انت شايفهم "يشير إلى الناس حوله" بيستنو كيس الطحين، كلهم مدنيين ولا واحد فيهم مقاوم، هادا مقاوم؟ "يسحب طفل الى جواره" تعال يا عمي، هادا مقاوم؟ هاد هادا مقاوم؟
عمار الحلو" شاهد 2": احنا بنطالب كل العالم، كل الأمة اليوم، الشعب الفلسطيني محارب علقمة العيش، اليوم لقمة العيش أصعب اشي، لا في أكل، لا في مية، لا في حياة كريمة، إلى متى؟ إلى متى هذا الظلم؟ إلى متى هذه المعاناة؟ إلى متى هذه الحياة الذل؟ إلى متى هذا القهر؟ القهر اليوم الذي يعيشه أبناء شعبنا الفلسطيني.
اليوم يموتون يموت أبناء شعبنا من أجل لقمة العيش، إلى متى؟ لا يوجد ماء لا يوجد حياة كريمة، اليوم يريدونا أن نرحل من أرض قطاع غزة، ولكن نحن صامدون شامخون نتحدى كل المؤامرات، نتحدى كل الظالمين ، نتحدى كل الطغيان (الناس حوله يرددون الله اكبر).
نقول لهم فشلت مؤامرة أمريكا، فشل العالم كله أن يركع هذا الشعب الفلسطيني، شعب صامد، شعب يتحدى كل المؤامرات، يتحمل الجمر، نار من جمر، نار من الظلم، (يبكي) كفى أيها العالم، كفى أيتها الأمة، كفى أيتها الأمة، اتقوا الله، اتقوا الله، أبناء شعبنا الفلسطيني يموتون من أجل لقمة العيش، إلى متى لقمة العيش مخضبة بالدماء.
اليوم لم نستطيع أن نأكل ولم نستطع أن.. (يرفع قميصه كاشفا عن بطنه) نحن نموت، والله العظيم نحن نموت------، إلى متى هذا الذل؟ إلى متى هذا الكيد؟ هذا الكيد الظالم؟، المؤامرة الامريكية ستفشل يا بايدن، ستفشل يا نتنياهو، والله إننا صامدون، والله سنبوس كنادر المقاومة وسنبوس جزمهم الذين صمدوا وشمخوا في وجه هذا العدوان.
المراسل لعمّار: مش خايف من القصف، من الموت، أولادك يفقدوك علشان كيس طحين؟
عمار: ايش اسوي، ايش بدي اسوي، الأخو لا راضي يطعمي، الصديق مش راضي يطعمي، محاربين في المية، المية العادية محاربين، المية العادية محاربين، الكل يقاتل الكل يموت من أجل لقمة العيش اليوم أصبح المواطن الفلسطيني همه كيف أن يجيب المياه، همه كيف أن يجيب لقمة الحطب لقمة الخبز، حياتنا صعبة، حياتنا مذلة، كفى ظلماً، كفى هوانا، كفى تشريداً لهذا الشعب الفلسطيني.
تامر أبو عقلين "شاهد 3": احنا ناس مدنيين، لا احنا جايين نقاتل احتلال، لا احنا جاييين، احنا جايين هان عشان لقمة العيش، احنا النا في الحرب اكتر من اربع شهور، اكل مش ملاقين بيت مالناش رغم الآلام ورغم الجراح ورغم اني ماشفتش اهلي المصابين لكن أنا مضطر أنا لما باشوف اخويا الصغير قاعد بيعيط، لما بنام بالتلات و الأربعة أيام مش ملاقي رغيف خبز ----- بدك اياني ما امتش.
اقسم بالله اقسم بالله والله على ما اقول شهيد اول امبارح طلعنا على الكويت انضربت علينا قذايف واتصاوبنا واتنيلنا واخدنا الأرض لكن انا مضطر اللي جيعان مستشرس اللي جيعان بيروح مش شايف قدامه غير مقطورة الطحين احنا بنكون واقفين بينا وبين الدبابة مش بعاد عنها 100متر وهادا اتحدى اذا حدا بيصل للحدود هادي لكن انا مابشوفش النجاة ومابشوفش خيط الامل الا بمقطورة الطحين وهي جاية عليا.
انا بضلني استنى من سبعة الصبح لحد أربعة العصر وبتيجي ايام بقعد أسبوع كامل كل يوم بطلع من سبعة الصبح لـ اربعة العصر بروح اجيب اشي لاخوتي، بروح اجيب اشي، احنا بنقوم بالخمسة للستة علشان نجيب كيس طحين واحد يطلع لكل عيلة 2 كيلو، لمين 2 كيلو؟ لواحد عنده 22 نفر ايش يعمل في 2 كيلو.
لما تطلع ثمان شباب من الدار من السبعة الصبح لاربعة العصر مروح ب 2 كيلو لمين؟ مش مكفي تعبك لما انا بروح من دوار الكويت من جو من نص المول بروح على الشجاعية وغيري بروح عالشمال وعبيت لاهيا بكيس طحين، اقسم بالله باصل الدار منهك، انا ماني قادر اقف، لو انا شب أي شب في أي دول العالم بده يأكل والله ال2 كيلو طحين ماهم مكفيني انا اكل لكن انا بأثر على نفسي باقول في الأصغر.
انا بروح وبعرض حالي للموت و للقتل، انت بتقولي بتهجموا؟ اه بنقدم، احنا لو بدنا بنخش على ---- بدنا نخش ، احنا قلت لك مانشفش الامل وخيط النجاة غير في المقطورة وهي جاية علينا، انا لما اشوف مقطورة الطحين وهي جاية باشوفش حاجة ، لو بدي اموت لو بده يطخني لو جبت اعتى قوات العالم لو جبت اقوى قناصات العالم ، انا لما باشوف مقطورة الطحين انا بموت عشان اخش الها.
الشعب لما بيهجموا ياعمي الناس هان جيعانة ، الناس بدها اكل، الناس لما بتجيب لي مقطورتين لمية الف نفر مين في العالمين ، شحنين ايش بتجيبوا؟ شاحنين تلاتة لمين الشاحنين لمين، انت هي خد هي جولة بالكاميرا تعتك وشوف اكم الف نفر بيقف، لمن احنا في مدرسة، انا نازح في مدرسة مدرسة في الوكالة، عنا ما يزيد عن 450 هوية متزوجة في المدرسة فوق بعض لما بتجيبي لي شحنين طحين للشعب كله لمين هدول؟ لمين؟ لمين؟
لما احنا قلت لك بنطلع 8 شباب ومروحين ب 2 كيلو طحين لمين نديهم؟ احنا شعب منكوب محاصر، احنا مش طالبين باشي كتير ، احنا طالبين بالاكل، يعني انت تو بتقولي بتعرض حالك للخطر؟ اه بدي اعرض حالي للخطر انا ما ملاقي فشي اشي اكله، لا اكل لا شرب، لكن انا بقولك احنا ثابتين وضايلين وشامخين في شمال غزة.
والله لو قطعتو عنا الاكل، لو قطعتوا عنا الكهرباء لو قطعتوا عنا المية احنا مش حنحيد ولا حنبدل " الناس من الخلف الله اكبر ولله الحمد" كلنا مع المقاومة كلنا حنضل ثابتين في شمال غزة وباذن الله لحد ما يتحرر آخر شبر في فلسطين.
احمد دعمش" شاهد4" : مافيش ولا نتفة طحين في الدار، مرة وحدة جيت اخدت طحين من البحر بعد هيك ماخدناش بالمرة وبنخاطر في حالنا عشان نطعمي أهلنا ونجيب اكل للدار، فش، ايش البديل؟ الرز وغلي الرز بكم الكيلو؟ ب 16 و 17 مين بده يشتريه؟
المصاري اللي الواحد كان محوشها صرفها، تستشهد وتتصاوب انت عرفت ايش مصيرك هان ولا تموت من الجوع، ولا مش موت الجوع؟ موت بطيء لما تموت من الجوع لو بدك تاكل ورق الشجر، بدنا نأكل طحين بدنا نجيب طحين زينا زي العالم بدنا نعيش.
محمد خازيق "شاهد 5": وبالنسبة لأهميته في البيت جنة، انك ولا انت لا مؤاخذة في هالكلمة اكلت هيك اليوم اكلت وضبطت امورك بدك تحسب لتاني يوم كنا قبل عادي، انا واحد من الناس هاتلي كيس الطحين وتعال عندي عجنتين بالضبط ويكون مخلص كيس الطحين عجنتين بالضبط ويكون مخلص كيس الطحين، انت قاعد تتكلم عن 12 نفر بقلب الدار ولما بيجي عندك حد نازح هيك كملت الطابة هيك كيس الطحين بيقعدش يوم .
محمد القايض " شاهد 6": يعني واحد من الناس انا متصاوب، ماكل إصابة ويعني ماعمري طلعتش من الدار، بس طالع علشان اجيب لقمة العيش، في أطفال في بدو يوكلو، بيصحى من النوم بده يعيط بده يوكل حط حالك مكاني ايش بدك تعمل.
هان رايحين على الطحين بيقولوا في طحين الله اعلم الله اعلم انه في طحين او لا الله اعلم اقسم بالله ماننا عارفين نموت ولا نعيش في اللحظة هاذي، بدنا نوكل اقسم بالله العظيم مافي اكل في الدار فش اشي في اطفال صغار بدو يوكلو قاعدين بيعيطو ------ بدهم يوكلو
محمد حجي" شاهد 7" : انا جاي والله علشان الولاد اللي عندي خمسة انفار نفسهم يعني يكون عندهم طحين، يعني مرت أكثر من 100 يوم على الحرب وكل ما وصل عند الكويت بيصلنش الدور أصلا ، البارحة---- عند الكويت، مسافة---- عند الأربعة مقاطير ماصحليش الدور.
بعدين هناك بهدلة طخطخة وبهدلة، يعني لما تروح هناك يعني الطحين من دمك، كمية اكل الطحين اللي بتجي عند الناس هان بتكفيش حد، يعني ----- فيش طحين فيش لخمة اللقمة تتغمس بالدم قاعدة اللقمة قاعدة تتغمس بالدم يعني المرة هديك انطخين علينا واتبهدلنا واتحاصرنا
المراسل لمحمد: مش خايف يعني على نفسك؟
محمد: مش خايف انا عشان ولادي انا مش خايف، انا مستعد اروح عند اليهود عند الدبابة بالضبط عشان اكل واشرب، عشان استر بيتي، مين بده يديني؟ فاضية، اكم مساعدة جتنا من اول الحرب لليوم، -----واحدة بتكفي هادي الناس؟ "طفل من المتجمعين يجيب بلا"، بتكفيش حد .
هاني فودة "شاهد 8": علشان انا اشتقت للطحين اشتقت للخبز يعني اقلك اللحمة بديش اياها حتى لو وجد، الخبز صار زاكي صار هو اللي بيمشي المعدة غيره بيضبطش معنا، الطحين صار ايش اقلك هدف زي مانقول أمنية، اقلك جاي انا احقق حلم دير بالك.
يا اشتري طحين يا يصحي لي كيس ولو متت زي مايقولو في عندي هدف كنت جاي اسعى له، اه اني احققه وان شاء الله بأحقق، يا أشتري يا المهم اليوم اكل طحين. والله احنا صامدين للأمانة ليش احنا مرحناش على الجنوب .
محمد أبو ضلفة " شاهد 9": الطحين اشي أساسي من مقومات الحياة الطحين مسكه الاحتلال علينا حتى يقتلنا فكان هو يمسك هادا الطحين ويقتل الناس بشكل بطيء زي ما بتفتح صنبور المياه بأي وقت انت بتفتحه بأي وقت انت بتسكره هادا الطحين استخدمه بلا مايستخدم الرصاص على شعب اعزل فقام الناس كل يوم قاعدة بتموت الناس مافش عندها أي مقوم للحياة.
مافش عندها اكل فش عندها شرب فش عندها مياه صالحة للشرب، المية تاعت الشتاء الناس بتستناها من ربنا علشان تشرب أولادها جالون المية رب الاسرة مش قادر يشتريه يشرب أطفاله الأطفال هادي والأطفال الرضع مش قادرين نشربهم اياه ، انا بآيس (أضحّي) بنفسي كرمال اضحي لأولادي لكن الحكومات العربية ما ضحّت بأنفسها كرمال الشعب الفلسطيني.
والله بالنسبة لعدد الانفار الموجود ماظنيتش انه الطحين يكفيهم لانه لو كل يوم بدك تضخ طحين في غزة الناس جيعانة وعطشانة وكل يوم الناس بتدفع فاتورة لثمن هذا كيس الطحين دم، دم كل يوم من أشلاء من جرحى من شهداء عشان ناخد كيس طحين نطعميه لاولادنا، بأي حكم هذا بيصير، بأي قانون رباني هادا بيصير.
شاهد"10": خلص بدنا نروح ايش بنسوي؟
المراسل: ليش انت جاي ياعز الدين؟عز الدين البايض" شاهد 11": والله أنا جاي هان يعني لاني اخد كيس الطحين هادا اول حاجة الظروف اللي احنا بنعيشها لا في طحين ولا في أي حاجة يعني صرنا ناكل الاعلاف تاعت الحيوانات الشعير القمح الذرة وهذا سيء.
انا جاي يعني لعل وعسى انه يطلع لي كيس طحين بالمساعدات اللي جاية، بدي اروح مكسور الخاطر ليش مافش ماضلش حاجة، يعني احنا الضحايا في النهاية يعني بتعرف حاجة اسمها ملح الحروب احنا ملح الحروب زي هاد وزي هاد وزي هادا وزي هادا "يشير إلى الناس حوله".
كل واحد اله عيلته بده يطعميها بده يشربها والمعاناة اللي بنعيشها فش حدا حاسس فيها، اشي طبيعي هادا انت تروح لاسرتك جيبك اول شي يعني لا معانا فلوس ولافي مواد غذائية ولافي تموين ولا في حدا بيسأل علينا، المواد التي تمرق من جانب الاحتلال الى وادي غزة لا تكفي احتياجات شمال قطاع غزة سواء 5%.
