شهادة نازح عن الحياة فيما تبقى من مدرسة إيواء في جباليا

هذهِ شهادة يسردها نازح فلسطيني في قطاع غزَّة عن الحياة فيما تبقى من مدرسة إيواء في جباليا تعرضت للدمار الكبير جراء القصف الإسرائيلي، ونشرتها قناة "الجزيرة مباشر" بتاريخ 31 يناير/ كانون الثاني 2024.

زي ما أنت شايف يا عمي، المدرسة مهدودة؟ شايف كيف؟ وأحنا قاعدين فيها وخايفين على حالنا منها
المي بتنزل علينا من فوق السطوح، شايف كيف؟ وقاعدين بمدرسة مهدودة، وأحنا حابين نروِّح على دورنا، ولا عنا أكل ولا عنا شرب، وخايفين كمان أن جيش الاحتلال يعيد على الدرسة كمان مرة وهي مهدودة، أو يخبط أي خبطة من قذيفة دبابة، قذيفة إف16 تهدم كل المبنى.

فش عنا أكل بالمرة، فش عنا طحين، حتَّى قمح فش عنا، غير بنجيب شعير وبنجيب ذرة من تبعة الدواب وبنطحنها مع بعض وبنعملها خبز، ومش نافع هالخبز .. قاسي، يعني ختيار كبير زيي في السن ملوش أسنان بقدرش ياكلها غير يرشها بميّة، والميّ هذهِ مش مي نظيفة، المي هذهِ بتطلع من الآبار مش نقية.

ولا ميّة، حتَّى الميّة فش عنَّا ميّة، حتَّى الميّة عاطلة تبعت آبار، حتَّى الأولاد الصغار والكبير في السن -أكرمك الله- صابه سيبان وقمل من قلة الميّة ومن المجاعة فيه.
زي ما أنت شايف اطلّع كيف الخمَّة والزبل والعفن، مش قادرين.. فش سيارة بلدية تيجي ترفعه، المجاري تطفى علينا، حمام واحد على 3600 واحد في المدرسة.. حمام واحد، وبنصف دور -أكرمك الله- زي الغنم، فش حمامات، فش ميّة نشطف للأولاد بالمرة، أحنا ناس مقطوعين بالمرة.  

  

الوسوم